Kryetari i KQZ, Ilirjan Celibashi ka propozuar fletën votimit për zgjedhjet e 25 prillit. Celibashi ka zgjedhur fletën e votimit ku partitë do të jenë me logo, ndërsa kandidatët me emra. Ky është varianti që kërkoi Partia Demokratike, ndryshe nga PS-ja që ishte për identifikimin me numra. Por Komisioni Rregullator me unanimitet shpalli moskopetencë për të miratimin e fletës së votimit.
E ftuar në ‘Zgjedhje 2021’ nga Alban Dudushi dhe Pranvera Borakaj, në Vizion Plus, Lealba Pelinku, zv/komisionere e KQZ-së, u shpreh se fleta e votimit pa emra, i privon zgjedhësit.
“Nisur nga risia e Kodit, sepse kjo është risi. Vota preferenciale… çfarë do të thotë? Pra, shkon dhe i jep votën kandidatit. Ky kandidat, ka një emër, ka një figurë, përfaqëson diçka. Ka votues të cilët, mund të mos jenë me subjektin, por kanë preferencën për kandidatin X, për atë çfarë përfaqëson ai kandidat. Ta vendosësh me numër, nuk i krijon kushtet e mjaftueshme votuesit për tu shprehur në mënyrë të drejtë vullnetin e tij.”
