Mbipopullimi i ambienteve dhe mungesa e theksuar e personelit mjekësor, në raport me nevojat shëndetësore të të burgosurve, janë ndër problematikat kryesore të konstatuara në Burgun e Shënkollit në Lezhë. Gjetjet janë bërë të ditura nga Avokati i Popullit, gjatë një inspektimi në këtë institucion.
‘Kushtet janë degraduese. Janë degraduese, ne po inspektojmë sot, po inspektojmë dhe nesër. Eshtë gjetur e njëjta e njëjta situatë, i njëjti realitet, 12 veta në një dhomë në kushte që janë denigruese për të drejtat e njeriut, janë shkelje direkte e të drejtave të njeriut. Ajo që ne konstatojmë është që këtu duhet në mënyrë urgjente ndërhyrje, duhet që këtu të kemi një spital me siguri të shtuar, jo një burg me dy psikiatër. Pra këtu ka mungesë ekstreme të stafit mjekësor, këtu ka kushte jashtëzakonisht të rënda”, tha Endri Shabani, Avokati i Popullit.
Shabani shtoi se këta të dënuar trajtohen në kushtete të papranueshme pasi nuk mund të përfitojnë as nga amnistitë.
“Pra këta, në vend që të trajtoheshin në një mënyrë më të lehtë për shkak sepse nuk arrijnë të kuptojnë pasojat e veprimeve të tyre, në fakt trajtohen edhe më keq sepse nuk përfitojnë nga amnistitë, sepse nuk mund të përfitojnë për shkak të sistemit të drejtësisë që ne kemi organizuar dhe kohë trajtohen në kushte që janë të papranueshme”, shtoi Shabani.
Aktualisht në Shënkoll ndodhen mbi 430 të burgosur me probleme shëndetësore, në një kohë kur kapaciteti maksimal është vetëm 280 persona.
