Trashëgimia e pronësisë ka nxitur herë pas here konflikte brenda familjes, ndërsa mënyra se si prindërit zgjedhin që t’i trashëgojnë fëmijës pronën e tyre janë nga më të ndryshmet.
Në traditën shqiptare, ekziston akoma mënyra e trashëgimisë tek djali i vogël i familjes, ndërsa avokatja Brunilda Lika ka dhënë detaje në kuadrin ligjor.
Në emisionin 7pa5 në Vizion Plus, Lika ka deklaruar se vullneti i prindërve është shprehur më së paku me testament, veprim ky që sipas saj ka nxitur edhe më shumë konfliktet brenda familjes.
Ndërkohë që një tjetër formë e përdorur është edhe dhurimi përmes një kontrate, kur pronari i pronës është ende gjallë.
“Ligji e ka regulluar kur prindërit ndahen nga jeta. Vullneti shprehet me testament. Ajo që prevalon më së tepërmi është kontrata e dhurimit. Prindërit zgjedhin që të nënshkruajnë një kontratë dhurimi dhe zgjedhin vullnetin e tyre që tja dhurojnë fëmijëve të tyre përpara se të ndërrojnë jetë. Testamenti është një formë jo aq shpesh e hasur në praktikat ligjore të vendit tonë, sepse mendojnë se nuk ndihen të sigurt që me largimin nga kjo botë nuk do të shkojë vullneti i tyre në vend. Të gjitha këto janë faktor ndikues. Testamenti nuk është asgjë tjetër përveçse shprehja e vullnetit të një individi të caktuar, që në momentin që ai ndahet nga jeta, prona që posedon në emrin e tij t’i kalojë dikujt tjetër.
Dhurimi është një kontratë që nënshkruahet në momentin që personi është gjallë, përapar një noteri dhe me vullnet të lirë vendos se kujt do i dhurojë pronën. Ndërsa testamenti është një veprim juridik i njëanshëm, që çelet pasi personi ka ndërruar jetë dhe trashëgimia është në dy forma: kemi kalimin e pronësisë me testament dhe kemi çeljen e trashëgimisë së pronësisë. Kjo e fundit nuk pasqyrohet me lënien e një testamenti, por dikush nga familjarët paraqitet para noterit dhe kërkon që të bëhetçelja e trashëgimisë dhe të thirren sipas radhës trashëgimarët ligjorë.
Testamenti nuk është kulturë në vendin tonë. Aktualisht po praktikohet çdo ditë e më shumë, por për kulturën tonë testamenti e nxit konfliktin në shoqërinë tonë.e kemi të vështirë të pranojmë që nëna ose babai nuk na kanë lënë asnjë pjesë nga pasuria e tyre”.
