Me debate është shoqëruar seanca e sotme plenare, mes deputetit të “Lëvizja Bashkë” Redi Muçi dhe kreut të Grupit Parlamentar të PS-së, Taulant Balla.
Muçi deklaroi nga foltorja se në Strasburg nuk mund të nënshkruhet asnjë rezolutë e përbashkët që nuk merr parasysh kërkesat e protestuesve, ndërsa renditi edhe njëherë kërkesat e tyre drejtuar qeverisë.
Më pas, Muçi iu drejtua Ballës, duke e akuzuar se tallet me protestuesit përmes postimeve që bën në rrjetet sociale.
“Një thirrje të fundit ia drejtoj Taulantit që çdo ditë merr fotot e orës 7 nga protesta dhe tallet me protestuesit. Kujdes se përballë nuk ke Saliun, por rininë shqiptare. Vazhdo me syleshtësinë tënde. Po jua kthej me fjalët e Viktor Hygosë: ‘Milord, po ju them se populli jam unë. Sot po më shtypni e tallni, por mjafton që akulli të kriset dhe gjithçka merr fund. Dridhuni milord’”, u shpreh Muçi.
Në përgjigje, Taulant Balla i tha deputetit se nuk ka asnjë të drejtë politike apo morale të flasë në emër të popullit, duke theksuar se ai ndodhet në Kuvend pas dorëheqjes së një deputeti tjetër.
“Ti s’ke asnjë të drejtë, as politike, as morale të flasësh në emër të popullit, sepse në këtë sallë në emër të popullit flet shumica e dalë nga vota e një viti më parë, ndërsa ti ke ardhur aksidentalisht, pas dorëheqjes së një deputeti tjetër, ke ardhur hajdutshe”, deklaroi Balla.
Ministri mohoi se tallet me protestën, duke thënë se postimet e tij janë një formë transparence për të treguar, sipas tij, përçarjen e protestës pas përfshirjes së opozitës.
“Nuk tallem me protestën. Kur nisi ishte e bukur. Statuset e mia të orës 7 tregojnë sesi, kur hyri Saliu, Gonia, Qorri apo ndonjë tjetër, flamingot fluturuan dhe ngelën sorrat si puna jote”, tha Balla, ndërsa vijoi me akuza edhe ndaj deputetit Goni, duke ngritur pretendime për shitjen e një apartamenti dhe duke shtuar se “flamingot janë zog shumë i pastër dhe nuk rri me llumin, prandaj ikën nga ju”.
