Një zjarr i përmasave të mëdha ka rënë pasditen e kësaj të hëne në fshatin Tre Urat, në Grabian, duke shkaktuar dëme të konsiderueshme materiale.
Flakët shpërthyen fillimisht në hangarët e bagëtive dhe u përhapën me shpejtësi, duke djegur plotësisht dy magazina me ushqim për bagëtitë, si edhe makineri e pajisje bujqësore.
Në vendngjarje kanë mbërritur dy mjete zjarrfikëse, por ndërhyrja është vështirësuar nga era e fortë, e cila ka favorizuar përhapjen e flakëve dhe ka rrezikuar edhe dy banesa pranë magazinave të përfshira nga zjarri.
Sipas banorëve, zjarri dyshohet se është shkaktuar nga një defekt në rrjetin elektrik. Ata shprehen se, për shkak të erës së fortë, telat elektrikë janë bashkuar, duke krijuar shkëndija që mund të kenë ndezur kashtën e depozituar në magazinë. Sasia e madhe e materialeve të djegshme bëri që flakët të përhapeshin edhe në një magazinë tjetër ngjitur.
Banorët tregojnë se kanë përjetuar momente paniku dhe se dëmet janë shumë të mëdha. Ata akuzojnë shërbimin zjarrfikës për ndërhyrje të vonuar, duke pretenduar se kjo ndikoi në përhapjen e flakëve dhe rrezikimin e banesave përreth.
Në zonë janë angazhuar edhe forca të shumta policie, të cilat po hetojnë për të zbardhur shkaqet e zjarrit. Ndërkohë, energjia elektrike është ndërprerë dhe, edhe pas më shumë se katër orësh, flakët vijojnë të mos jenë vënë plotësisht nën kontroll.
