Grindja e dy fëmijëve që nuk do të ngjiten në skenë vjen këtë fundjavë në Teatrin Eksperimental. Është pikërisht kjo zënkë që i çon në konflikt jo vetëm prindërit e të ashtuquajturit fëmijë që ushtron dhunë, por edhe familjen e të dhunuarit.
Prindërit e fajtorit nisen në shtëpinë e të dhunuarit për të kërkuar falje, por gjatë darkës që nis me diplomaci, pija i degradon ata deri në konflikte. Një tekst i shkëlqyer i një prej shkrimtareve dhe analisteve më në zë të Francës sot, përkthyer nga Nasi Lera, ngjitet në skenë nën regjinë e Kiço Londos që thekson se ka qenë besnik i vepër së shkruar për teatër, përpara se të realizohej edhe në kinematografi.
Konflikti i parë sjell një tjetër me çiftin, e më pas një tjetër me vetë partnerët, çka sipas aktorëve sjell përmes “Zotit të Masakrës”, tre shfaqje të ndryshme.
“Zoti i Masakrës”, një komedi e vlerësuar si më e mira e 10 viteve të fundit, e me shumë çmime teatrale vjen nga kjo e shtunë e përgjatë gjithë marsit në Teatrin Eksperimental.
