Astrit Patozi ka komentuar deklaratën e kreut të PD-së, Lulzim Basha, teksa ironizoi Ramën duke vënë në dukje se pas 8 vjetësh pranoi se drejton një qeveri të zhytur në korrupsion.
Në një postim në “Facebook”, ish-kreu i Bindjes Demokratike theksoi se kemi hyrë në një stinë të nxehtë gjuetie dhe nuk dihet asnjëherë në “ujërat e kujt do të zërë rrjeta.”
“QELBEN TË GJITHË DHE NJËSOJ NGA KOKA
Dakord jemi, more udhëheqës, është e vërtetë dhe s’e luan topi që peshku nga koka qelbet. Por kjo vlen për të gjithë peshqit, jo vetëm për ata që kapen në gjolin e komshiut. Se kur bie fjala për pellgun tënd e kanë fajin cironkat e Pogradecit dhe sardelet e Divjakës. Dhe kështu i bie që peshku të qelbet nga bishti, apo jo? Ndaj edhe mos u tundo kaq shumë, kur e ngre stekën lart, se mund të të bjerë kokës. Dhe bëj kujdes kur përdor terma peshkimi këto ditë, sepse ngjan të kemi hyrë në një stinë e nxehtë gjuetie dhe nuk dihet asnjëherë në ujërat e kujt do të zërë rrjeta. Sepse do të jetë siklet i madh pastaj që t’i ndash peshqit në fajtorë dhe të pafajshëm, në varësi të vendit ku kapen.”
