Kanosi me armë të dyshuar manovër policët gjatë operacionit për kapjen e vëllait, arrestohet 41-vjeçari në Elbasan
Një 41-vjeçar është arrestuar në Elbasan pasi dyshohet se ka kanosur me një armë të dyshuar manovër katër punonjës të Forcës Operacionale të DVP Elbasan, të cilët po kryenin kontrolle për kapjen e vëllait të tij, i shpallur në kërkim.
Ngjarja ka ndodhur në lagjen “Visarion Xhuvani”, gjatë një operacioni policor për kapjen e shtetasit B. B., i kërkuar për veprën penale “Mbajtja pa leje dhe prodhimi i armëve, armëve shpërthyese dhe municionit”.
Sipas Policisë, gjatë kryerjes së kontrolleve dhe veprimeve të tjera operacionale, vëllai i tij, shtetasi B. B. (Ç.), 41 vjeç, banues në Elbasan, ka kanosur efektivët duke përdorur një send të ngjashëm me armë zjarri.
Në vijim të veprimeve, specialistët e Hetimit të Krimeve të DVP Elbasan, në bashkëpunim me oficerët e Policisë Gjyqësore të Prokurorisë, bënë arrestimin në flagrancë të 41-vjeçarit. Gjatë veprimeve policore u sekuestrua edhe sendi i dyshuar si armë manovër.
Ndërkohë, vijojnë kontrollet intensive për kapjen e shtetasit B. B., i cili vijon të jetë në kërkim.
Materialet procedurale iu referuan Prokurorisë për veprime të mëtejshme ndaj 41-vjeçarit, për veprat penale “Kanosja për shkak të detyrës” dhe “Mbajtja pa leje dhe prodhimi i armëve, armëve shpërthyese dhe municionit”.
