Paz izolimit katërditor të arteries kryesore të juglindjes nga rrëshqitja masive e dheut në aksin Librazhd – Pogradec, kreu i Autoritetit Rrugor Shqiptar Ami Kozeli në një dalje publike deklaroi se do të ndërtohet një rrugë alternative për t’i dhënë një zgjidhje provizore situatës alarmante.
Megjithatë drejtuesi i ARRSH nuk dha një përgjigje përfundimtare se kur pritet të përfundojë ndërtimi i aksit alternativ.
Aulon Kalaja, ish-kandidat i PD-së për deputet në qarkun e Durrësit i ftuar në “Quo Vadis” në Vizion Plus, nën moderimin e Pranvera Borakajt ironizoi situatën në juglindje dhe propozoi rikthimin e një linje direkte ajore Tiranë-Korçë, e cila ka ekzistuar në kohën e Ahmet Zogut.
Kalaja: Në kohën e Ahmet Zogut ka qenë një linjë direkte Korçë-Tiranë, me avion. Mendoj që është momenti që të rikthejmë edhe një herë këtë linjë. Përtej shakasë, kemi një ministri e cila është jashtë funksionit. Ka katër muaj që nuk punon. Katër muaj jemi marrë me një hall personal, kjo ministri është jashtë funksionit.
Unë s’e di kush është drejtori i ARRSH. Mendoj qe duhet të futemi në një shtet normal që të diskutojmë sa asfalt do hedhim. Rama ka shkuar me helikopter, shumë bukur. Propozimi është që një helikopter duhet të rrijë për të sëmurët atje. Janë disa punëtorë turq dhe nuk kishin për të ngrënë. Jemi kthyer si në kohën e Skënderbeut. Lumi Shkumbin është egërsuar dhe ka dalë kundër nesh, kundër atyre që kanë gërmuar aty. E kanë trajtuar shumë keq lumin Shkumbin./vizionplus.tv
