Nis rikonstruksioni i sallës “Çehov” dhe hapësirave mbështetëse, të cilat do t’i shërbejnë aktorëve të teatrit të Metropolit. Kjo sallë që njihej dikur si estrada e Tiranës nuk përdorej prej sezonit të shkuar për shkak të lagështirës, por edhe braktisjes ndër vite.
“Kemi rikuperuar axhendën e shfaqjeve, por duhet të rikuperojmë edhe infrastrukturën, ndaj ka ardhur koha që të ndërhyjmë. Mund të kemi infrastrukturën më moderne, por nëse kemi një kulturë minimale si qytetarë, shkatërrojmë çdo investim. E keni vënë re që kur investojmë njëkohësisht edhe në infrastrukturë, edhe në kulturë, kultura që ndërtohet ruan edhe infrastrukturën, ndaj të dyja jo vetëm që nuk janë të ndara, por janë të lidhura rrënjësisht me njëra-tjetrën.”
Kryebashkiaku Veliaj theksoi se punimet nuk do të pengojnë aktivitetet kulturore, pasi ato do të alternohen duke bërë të mundur që teksa në njërën sallë punohet, në tjetrën të jepen apo organizohen aktivitete dhe shfaqje të ndryshme.
