Julian Cumraku dhe Erzen Uka, të arrestuar pak ditë më parë në Orosh të Pukës, u lanë në burg kete të enjte nga Gjykata e Shkodrës.
Prokuroria i akuzon ata për 4 vepra penale, “Nxitja, thirrja publike dhe propaganda për kryerjen e veprave me qëllime terroriste”, “Prodhimi i armëve luftarake”, “Kundërshtimi i punonjësit të policisë së rendit publik”, si dhe “Mbajtja pa leje dhe prodhimi i armëve shpërthyese dhe i municionit”.
Por sipas avokatit të Erzen Ukës, për klientin e tij qëndron vetëm akuza e fundit ajo e armëmbajtjes pa leje.
Avokati i Erzen Ukës: Ka vetëm një akuzë, armëmbajtje pa leje. Unë kërkova vlerësimin e paligjshëm të arrestit në flagrëncë për sa i përket të mbrojturit nga ana ime, Erzen Uka, i cili ëhstë ndodhur në atë banesë në mënyrë rastësore. Rastësisht ka shkuar edhe policia në atë banesë pasi ka qenë duke zhvilluar një operacion kundër lëndëve narkotike. Erzen Uka ka qenë nën vëzgim nga policia e shtetit. Ai ka qenë i rregullt dhe nuk ka kryer asnjë shkelje në shtetin në të cilin ne jetojmë.
I pyetur se çfarë deklaruan dy të akuzuarit për armët dhe flamurin me logon e ISIS në banesë avokati tha: Nuk është cilësuar në asnjë deklaratë që është plagosur nga policia apo RENEA. Kemi të bëjmë me disa rrethana të paqarta për armët që janë gjetur. Me Cumrakun kanë lidhje shoqërore dhe e kishte marrë në shtëpi. Akuzohen vetëm për amrëmbajtje pa leje. S’ka prova, as policia e shtetit nuk e dyshon (për lidhje me ISIS). Nuk është flamur, është gjetur vetëm një shkrim në mur dhe po hetohet. Erzen Uka ka deklauar se s’ka lidhje me armët. Ai nuk e di të kujt janë. Cumraku tha në gjyq që “janë armë të vjetra që unë i kam mbledhur në fshat dhe i kam grumbulluar në atë banesë”.
E megjithatë grupi hetimor që në fillim ka pasur dyshime të forta se të dy janë të indoktrinuar me prirje ekstremiste, pasi Erzen Uka, ish-komando ka qenë i dënuar më parë për nxitje të terrorizmit ndërkohë që edhe Julian Cumraku rezulton i dënuar më herët.
Banorët e zonës kanë folur edhe për një person të tretë pasi të dy ata janë parë shpesh herë në shoqërinë e një personi me flokë të gjata, po për këtë të fundit avokati Ukës tha se një pretendim i tillë është i pabazë.
“S’ka lidhje fare me asnjë person të tretë”, tha ai.
