Cristina Perez Galcenco, 21-vjeçarja dhe vajza e një ish-portieri spanjoll, Nacho Pérez u gjet e pajetë të martën në Caleta de Velez, Costa del Sol, pranë Malagës. E lindur në Lanzarote, Cristina konsiderohej me një të ardhme premtuese në modelim, duke marrë pjesë në shfaqje mode në qytete të mëdha si Londra, Madridi, Milano dhe Parisi. Burime të sigurta bëjnë me dije se vdekja e saj nuk po trajtohet si e dyshimtë.
Cristina kishte nisur karrierën e saj si adoleshente në Pasarela Campoamor në Oviedo, një event mode ku u bë e njohur për herë të parë. Ajo ka marrë pjesë gjithashtu në Javën e Modës në Madrid dhe ka realizuar fushata reklamash për marka të mëdha si Stradivarius, përveç që ka prezantuar koleksione të reja të markave si Versace dhe Louis Vuitton. Trupi i saj pritet të transferohet në Asturias, ku ka kaluar fëmijërinë, për të kryer ceremoninë mortore.
Fotografja Xana de Jesus i ka bërë një homazh emocional, duke thënë se Cristina do të mbetet gjithmonë një yll dhe shembull për të tjerët, si në karrierën e modelimit, ashtu edhe si person. Miq të tjerë e përshkruan atë si një engjëll, duke shprehur dhimbjen e thellë për humbjen e saj të parakohshme. Prindërit e saj, ish-portieri Nacho Perez dhe nëna e saj e lindur në Moldavi, Tatiana Galcenco, ende nuk kanë bërë komente në rrjetet sociale.
Në një intervistë të fundit, Cristina kishte treguar se pjesëmarrja në shfaqje dhe fushata reklamash e kishte sjellë afërsisht me kultura dhe njerëz të ndryshëm, por gjithashtu e kishte ndjerë vetminë që shpesh shoqëron këtë profesion. Ajo po ndjekte një kurs studimi në Malaga rreth kohës së vdekjes, ndërsa pranoi se fillimi i karrierës në moshë të re e kishte vështirësuar përballimin e disa sfidave të modelimit.
/vizionplus.tv
