“Nëna e të gjitha bombave” në Iran? Një hap i tillë nga SHBA mund të përshkallëzojë ndjeshëm kofliktin
Ushtria amerikane po shqyrton mundësi të reja për të goditur Iranin, në një kohë kur lufta vijon prej më shumë se gjashtë muajsh dhe nuk ka shenja të qarta për një marrëveshje që do t’i japë fund konfliktit.
Sipas disa zyrtarëve amerikanë të njohur me diskutimet e brendshme, planet e reja përfshijnë edhe përdorimin e bombës e njohur ndryshe si “Nëna e të gjitha bombave”. Ajo është bomba më e madhe jo-bërthamore në arsenalin e Shteteve të Bashkuara.
Përdorimi i saj kundër Iranit do të shënonte një përshkallëzim të rëndësishëm të konfliktit. Objektivat e mundshme përfshijnë infrastrukturën energjetike dhe centralet bërthamore, nëse presidenti Donald Trump jep urdhër për rifillimin e operacioneve ushtarake.
Megjithatë, brenda qarqeve amerikane ka pikëpyetje nëse këto sulme do të sillnin rezultate konkrete në terren apo do të ndryshonin ekuilibrin e luftës. Disa zyrtarë shprehin privatisht dyshime nëse administrata Trump ka një strategji të qartë që mund ta çojë konfliktin drejt përfundimit.
Presioni ndaj presidentit amerikan po rritet, ndërsa lufta është bërë gjithnjë e më jopopullore në mesin e amerikanëve. Republikanët përballen me shqetësimin se pakënaqësia e votuesve mund të ndikojë në rezultatet e zgjedhjeve të mesit të mandatit.
Për muaj të tërë, Trump dhe këshilltarët e tij kanë diskutuar mundësi të ndryshme për t’i dhënë fund konfliktit, përfshirë skenarë që do të mund të paraqiteshin politikisht si një përfundim vendimtar i luftës.
Ndërsa disa përfaqësues të administratës e kanë cilësuar luftën si të fituar në thelb, Trump ka shmangur shpalljen e fitores, duke theksuar se Shtetet e Bashkuara kanë ende objektiva të papërmbushura në Iran.
Gjatë javëve të fundit, në Shtëpinë e Bardhë janë zhvilluar takime për të shqyrtuar alternativat e mundshme. Edhe pse Trump ka deklaruar publikisht se nuk planifikon veprime të reja para zgjedhjeve të mesit të mandatit, disa këshilltarë pranojnë privatisht se nuk janë të sigurt nëse ky qëndrim do të mbetet i pandryshuar.
