Liderët e 20 vendeve më të pasura të botës janë mbledhur këtë të shtunë në romë të Italisë për të marrë pjesë në një samit dy ditor ku në fokus do të jenë ndryshimet klimatike dhe ekonomia globale.
Kryeministri italian, Mario Draghi, teksa mirëpriti udhëheqësit e G20-ës në sallën e kongreseve, deklaroi se e vetmja mënyrë për të përballuar vështirësitë është bashkëpunimi.
MARIO DRAGHI
KRYEMINISTRI I ITALISË
“Bashkëpunimi është përgjigja më e mirë për problemet që po përballemi sot. Në shumë raste vetëm në këtë mënyrë mund të zgjidhim problematikat e mundshme, nga pandemia, klima dhe nga taksat. Nuk është një opsion. Ne duhet të kapërcejmë dallimet tona dhe të riformojmë qëndrimin e këtij forumi.”
I pranishëm është edhe president i Shteteve të Bashkuara të Amerikës ,Joe Biden i cili pritet të insistojë në rritjen e prodhimit të energjisë.
Ndërkohë, presidenti rus Vladimir Putin dhe presidenti kinez Xi Jinping, do të marrin pjesë përmes video-konferencës.
Samiti dy ditor u prit me protesta, pasi dhjetëra aktivistë për mbrojtjen e mjedisit tentuan të bllokojnë rrugët. “Nëse nuk ndryshon diçka, ne do të bllokojmë qytetin”, ishte slogani i protestuesve, të cilët marshuan drejt Ministrisë italiane të Mjedisit .
