Forcat e policisë zviceriane janë vënë në ndjekje të një personi mjaft të rrezikshëm, i cili ditën e sotme vrau me armë dy persona dhe plagosi një tjetër.
BBC raporton se mëngjesin e së hënës në qytetin e Sionit u vranë dy persona ndërsa një tjetër u plagos.
Policia ka njoftuar qytetarët që të bëjnë kujdes nga autori i dyshuar, pasi konsiderohet mjaft i rrezikshëm ndërsa kanë shpërndarë dhe foto të tijat.
Sipas policisë autori i dyshuar është Robin Sebastien, ndërsa njofton qytetarët që të qëndrojnë larg tij pasi është mjaft i rrezikshëm.
Gjithashtu njoftohet se autori dhe viktimat kanë patur njohje me njëri-tjetrin.
“Sipas gjetjeve fillestare, autori i ka njohur viktimat e tij”, tha policia, duke shtuar se motivet pas ngjarjes mbeten të panjohura.
Të shtëna thuhet se janë qëlluar në kompaninë e pikturës Sarosa në zonat Ronquoz dhe Potences, raporton gazeta lokale Le Nouvelliste.
I dyshuari 36-vjeçar është parë për herë të fundit duke drejtuar makinën e tij ngjyrë gri, Peugeot 206 Cabriolet.
Policia ka vendosur blloqe rrugore rreth Valois, në mënyrë që të mos lejojë autorin e dyshuar të largohet jashtë vendit.
Qyteti i Sionit ndodhet afër kufirit italian.
Ekziston gjithashtu një prani e madhe e policisë në qytet, me oficerë të armatosur të vendosur në skenat e krimit.
Prokurorët vendas kanë hapur një hetim për vrasje.
Zvicra, një vend me rreth nëntë milionë banorë, ka një shkallë të lartë të posedimit të armëve.
Small Arms Survey, një organizatë me bazë në Zvicër që monitoron tendencat globale të dhunës së armatosur, vlerëson numrin e armëve të zjarrit në posedim të civilëve në 2.3 milionë. /Vizionplus.tv/
