Kryeministri i Polonisë, Donald Tusk, ka tërhequr vëmendjen gjatë një deklarate për mediat nga Qiproja, në kuadër të një samiti informal të liderëve të Bashkimit Evropian, duke thënë se mes liderëve evropianë ndjehet “një lehtësim i madh” sepse “për herë të parë pas shumë vitesh nuk ka rusë në sallë”.
Sipas interpretimit të mediave ndërkombëtare, Tusk i referohej mungesës së kryeministrit hungarez Viktor Orbán në disa takime të fundit evropiane, pas zhvillimeve politike në vendin e tij, si dhe qëndrimeve të konsideruara pro-ruse të Ficos.
Më pas, kryeministri polak u përpoq të zbusë deklaratën duke e quajtur “thjesht një shaka”.
Ai e përsëriti më vonë mesazhin në rrjetin social X, duke shkruar “nuk ka rusë në sallë”, pa përmendur drejtpërdrejt Ficon apo Orbanin.
Robert Fico ka qenë një nga zërat më kritikë ndaj politikës së BE-së për Ukrainën, duke u përplasur shpesh me linjën zyrtare të Brukselit. Ndërkohë, pas zhvillimeve të fundit politike në Hungari dhe largimit të ndikimit të Viktor Orbánit nga posti i kryeministrit, ai shihet si një nga figurat më të izoluara në Këshillin Evropian.
Diplomatë dhe zyrtarë të BE-së, të cituar nga mediat ndërkombëtare, kanë folur për një “atmosferë krejtësisht të re” në Bruksel, ku disa dosje të bllokuara prej kohësh, përfshirë sanksionet ndaj Rusisë, zgjerimin e BE-së dhe ndihmën për Ukrainën, po marrin sërish rrugë përpara.
