Gent Cakaj ka uruar për postin e tij të ri ministrin e Jashtëm të Kosovës, Glauk Konjufca. Bideda mes dy ministarve është zhvilluar përmes telefonit, teksa u shprehën të gatshëm për bashkëpunim të ndërsjelltë.
Ministri për Punët e Jashtme vlerësoi edhe kontributin dhe përkushtimin e Behgjet Pacolli për të gjithë shqiptarët.
“Z. Pacolli ka bërë një punë të palodhshme për shtimin e numrit të njohjeve të Kosovës dhe ruajtjes së njohjeve ekzistuese. Për më shumë, ai ka punuar me përkushtim për rritjen e bashkëpunimit mes vendeve tona. Në këtë kontekst, mes shumë të tjerash, Pacollit i mbetem tepër mirënjohës edhe për përgjigjen pozitive të kërkesës sonë për t’i siguruar Shqipërisë qasjen në hapësirat e konsullatave të Republikës së Kosovës në Malmo, Dyseldorf, Stuttgard, Hamburg e Toronto.”
Cakaj përfundoi urimin e tij në “Facebook” duke vënë theksin në thellimin e mëtejshëm të marrëdhënieve mes Kosovës dhe Shqipërisë.
