Ministri i Jashtëm në Detyrë, Gent Cakaj ka zhvilluar këtë të mërkurë një takim me homologun e Kosovës, Glauk Konjufca, ndërsa e vuri theksin te zgjerimi i bashkëpunimit mes dy vendeve.
Sipas Cakajt, kufiri mes Kosovës dhe Shqipërisë duhet të hiqet menjëherë dhe vendet të gëzojnë liri të pakufizuar qarkullimi dhe mundësi për ndërveprim ekonomik. Ndërsa nënvizoi krijimin e një platforme të përbashkët politike.
“Kufiri mes dy vendeve nuk duhet të ekzistojë fare duhet të hiqet menjëherë dhe vendet tona të gëzojnë liri të pakufizuar qarkullimi dhe mundësi për ndërveprim ekonomik. Kosova dhe Shqipëria duhet të lëvizin drejt një bashkëpunimi të zgjeruar. Të krijojmë një platformë të përbashkët politike. Politika e Kosovës dhe Shqipërisë duhet të kenë një qasje me synime komplementare. Deri tani bashkëpunimi ka qenë intensiv, por nga tani e tutje duhet të kemi një bashkëpunim maksimal.”
Ndër të tjera, ministri Cakaj i ka propozuat Konjufcës krijimin e dy marrëveshjeve.
“Marrëveshja e parë është që duhet të mblidhemi të firmosim një marrëveshje për ndarjen e shpenzime dhe detyrave në një fushatë për lobimin e njohjes së Kosovës. Jemi të gatshëm për ta firmosur këtë marrëveshje. Marrëveshja e dytë është për transmetimin e përvojave në procesin e screening, sa i takon procesit të negociatave.”
