Nga Ervin Sina
Sigurimi i një bilete për ndeshjen e shumëpritur Shqipëri-Serbi po kthehet në një stres më vete për mijëra e mijëra shqiptarë brenda dhe jashtë vendit.
Ndryshe nga tradita, kur biletat janë shitur onlinë ose fizikisht, këtë herë Federata Shqiptare njoftoi aplikimin e lotarisë për të përcaktuar fatlumët që do të kenë mundësi të futen në stadium në Tiranë në datën 7 qershor.
Sipas FSHF duke qenë se kërkesat pritet të tejkalojnë kapacitetin e stadiumit, tifozët do të kenë mundësinë të plotësojnë një formular aplikimi elektronik, për të shprehur interesin e tyre për të siguruar bileta.
Ky formular do të publikohet nga FSHF më 15 maj 2025 dhe çdo aplikant mund të kërkojë deri në 4 bileta.
Pas përfundimit të afatit të aplikimeve, do të kryhet një përzgjedhje e rastësishme dhe automatike përmes shortit kompjuterik të aplikantëve, të cilët do të kenë më pas mundësinë për të blerë biletat, ndërsa fituesit do të njoftohen disa ditë para ndeshjes nëpërmjet adresës së tyre elektronike për të bërë edhe pagesën online.
Kjo procedurë vlen për çdokënd, pavarësisht se ku jeton brenda apo jashtë Shqipërisë.
Të vetmit që janë të përjashrtuar nga kjo procedurë janë anëtarët aktivë të Klubit, Tifozët e Kombëtares.
Sipas FSHF ata e kanë vendin e tyre në stadium të garantuar dhe do të marrin një link të personalizuar në adresat e tyre të email për të kryer blerjen e biletës brenda periudhës së përcaktuar.
Kjo gjë ka krijuar një pakënaqësi stë dukshe te grupi “Tifozët Kuqezinj” të cilët madje që në ndeshjen e fundit me Andorën, u përjashtuan nga e drejta për të marrë bileta në grup sikurse kishte ndodhur për vite me radhë./vizionplus.tv
