Avokati Arbër Hoxha, i ftuar mbrëmjen e kësaj të enjteje në Quo Vadis të moderatores Pranvera Borakaj në Vizion Plus, ka komentuar “shfaqjen” e Lulzim Bashës në dyert e SPAK, ku është pyetur nga prokurorët lidhur me ngjarjen e 21 janarit të vitit 2011, ku mbetën të vrarë 4 qytetarë në Bulevard.
Hoxha tha se, duke parë situatën ku Basha tashmë është i mbetur vetëm, ai mund të shfrytëzohet më së miri nga SPAK, duke u marrë fillimisht i pandehur e më pas për t’u përdorur si bashkëpunëtor i drejtësisë.
I pyetur se deri ku mund të shkojë kjo çështje, avokati tha se mund të arrihet deri te drejtuesit më të lartë të Gardës dhe kryeministri i asaj kohe, Sali Berisha.
Sipas tij, ky është momenti kur drejtësia e re mund të bëjë një gjë të mirë për qytetarët, duke zbardhur vrasjen e katër qytetarëve.
“SPAK mund ta bëjë dëshmitar të drejtësisë zotin Basha, për të zgjidhur njëherë e mirë vrasjen e katër qytetarëve në Bulevard. Reforma në Drejtësi duhet t’u sjellë një gjë të mirë qytetarëve, dhe këtë vrasje duhet ta zbardhë. Të gjithë ata që kanë dhënë komandë drejtuesi i Gardës, ministri i Brendshëm i kohës dhe kryeministri i kohës duhet të përgjigjen”, tha Hoxha.
