Kreu i Partisë Demokratike, Lulzim Basha premtoi rikthimin në Shqipëri të qytetarëve që janë larguar nga vendi.
Me anë të një videoje në “Facebook”, Basha akuzoi kryeministrin Edi Rama se ka detyruar shqiptarët të braktisin vendin. Ai e quajti Ramën katastrofë kombëtare.
“Për shkak të Ramës, të rinjtë tanë po largohen nga Shqipëria. Është koha ta largojmë Ramën dhe t’u rikthejmë shqiptarëve shpresën! Ne kemi përjetuar një katastrofë kombëtare. 500 mijë shqiptarë kanë braktisur vendin gjatë qeverisjes së Ramës. 500 mijë shqiptarë humbën besimin. Hoqën dorën nga shpresa dhe nuk panë më të ardhme në këtë end. Politikat e Ramës bënë që brezat tanë të ardhshëm të zhduken. Dhe as që ka në plan t’i kthejë sërish. Këta njerëz kanë marrë vendime të vështira, kanë lënë pas të dashurit dhe tokën e tyre. Ja sesa keq e ka qeverisur Rama vendin tonë. Ai është katastrofa jonë kombëtare. Ne do të sjellim punë e mundësi të reja. Ne do të kthejmë në këtë vend shpresën dhe ata që janë larguar prej tij.”
