Banorët e Rrjollit u rikthyen në protestë këtë të shtunë, për të kundërshtuar ndërtimin e një resorti turistik në zonë.
Ata u përplasën me policinë gjatë përpjekjes për të ndaluar punimet në pronat e tyre, ku po ndërtohet resorti.
Sipas banorëve, kordoni i policisë nuk i lejon të hyjnë në tokat e tyre dhe mjetet e ndërtimit vazhdojnë punimet.
Banorët kanë qëlluar me gurë drejt fadromave të kompanisë, duke iu kërkuar punonjësve të zbresin dhe të mos tentojnë të nisin punën.
Sipas tyre, dokumentacioni që ata zotërojnë provon pronësinë e ligjshme të tokës dhe kërkojnë nga organet e drejtësisë që çështja të trajtohet me prioritet, duke shmangur zvarritjen e mëtejshme të procesit.
Projekti në fjalë parashikon ndërtimin e një kompleksi turistik në një sipërfaqe prej rreth 146 hektarësh në zonën ranore pranë Velipojës.
