Amabsadori rus në Shtetet e Bashkuara deklaroi se presidenti amerikan Donald Trump dhe ai rus, Vladimir Putin kanë diskutuar për “propozime konkrete” për zgjidhjen e konfliktit në lindje të Ukrainës, gjatë samitit të tyre në Helsinki.
Ambasadorit Anatoly Antonov duke iu referuar konfliktit në lindje të Ukrainës dhe jo propozimit për referendum, ka thënë se kjo është një çështje që duhet diskutuar.
Ai ka thënë se “janë bërë propozime konkrete në atë se si të zgjidhet kjo çështje”, por nuk dha më shumë detaje mbi këto propozime.
Ndërsa presidenti i SHBA-së, Donald Trump përmes një statusi në Tëitter shkruan se ka biseduar me Putinin për situatën në Ukrainë, por ai nuk ka përmendur mbajtjen e një referendumi eventual dhe nuk ka dhënë më shumë detaje, sa i përket çështjes së Ukrainës.
Mbi 10,300 persona janë vrarë që prej prillit të vitit 2014, kur nisi konflikti në mes të forcave ukrainase dhe separatistëve të mbështetur nga Rusia në rajonet Donjetsk dhe Luhansk të Ukrainës.
Moska aneksoi gadishullin ukrainas të Krimesë dhe mbështetja që i ofroi separatistëve, shtyri që Shtetet e Bashkuara, Bashkimi Evropian dhe shtete të tjera, të vendosnin sanksione ndaj Rusisë./REL
