Zyrtarët ukrainas dhe amerikanë pritet të takohen sot në Arabinë Saudite pas bisedimeve ruso-amerikane atje një ditë më parë mbi propozimin për një armëpushim të kufizuar në Detin e Zi.
Uashingtoni shpreson se ky armëpushim i kufizuar do t’i hapë rrugën negociatave më të gjera të paqes.
Lexo edhe :
Bisedimet njëditore dje në Arabinë Saudite midis zyrtarëve rusë dhe amerikanë u përshkruan nga Uashingtoni si një hap në përpjekjen e Presidentit Donald Trump për t’i dhënë fund luftës trevjeçare.
Shtëpia e Bardhë tha se po bëhet përparim në bisedimet në Riad dhe se një “njoftim pozitiv” pritet “shumë shpejt”.
Një burim rus i tha Reuters se bisedimet në Riad u përfunduan dje vonë dhe se një projekt-deklaratë e përbashkët ishte dërguar në Moskë dhe Uashington për miratim, me të dyja palët që planifikojnë ta bëjnë publike sot.
Megjithatë, zëdhënësi i Kremlinit, Dmitry Peskov kishte deklaruar më herët se asnjë dokument nuk do të nënshkruhet, siç raportoi agjencia TASS.
Presidenti ukrainas Volodymyr Zelensky tha në fjalimin e tij televiziv të mbrëmjes se zyrtarët e qeverisë së tij në Riad do të takohen me delegacionin amerikan pas bisedimeve Rusi-SHBA.
Transmetuesi publik ukrainas Suspilne raportoi, duke cituar një burim në delegacionin ukrainas, se bisedimet do të zhvillohen sot.
Javën e kaluar, Rusia hodhi poshtë propozimin e Trump për një armëpushim të plotë 30-ditor në Ukrainë dhe deri më tani ka rënë dakord për një moratorium mbi sulmet ndaj infrastrukturës energjetike.
Dje, Trump përshkroi çështjet që ai tha se ishin në tryezë: “Tani për tani po flasim për territoret. Po flasim për energjinë, për pronësinë e termocentraleve. Disa thonë se SHBA duhet të ketë termocentralin… sepse ne kemi njohuritë”.
Ndërsa bisedimet Rusi-SHBA po zhvilloheshin dje, Ukraina dhe Rusia vazhduan sulmet e tyre, ku Kievi deklaroi se një sulm raketor rus rezultoi në të paktën 88 persona të plagosur dhe Moska akuzoi Ukrainën për një sulm të synuar që mori jetën e dy gazetarëve dhe shoferit të tyre.
“Moska flet për paqen ndërsa kryen sulme brutale në zonat me popullsi të dendur në qytetet kryesore të Ukrainës,” tha Ministri i Jashtëm ukrainas Andriy Sibikha.
“Në vend që të bëjë deklarata boshe për paqen, Rusia duhet të ndalojë bmbardimin e qyteteve tona dhe t’i japë fund luftës së saj kundër civilëve.”
Bisedimet e djeshme pasuan thirrjet telefonike midis Trump, Zelensky dhe presidentit rus Vladimir Putin dhe një takim midis zyrtarëve ukrainas dhe amerikanë në Arabinë Saudite të dielën.
Shtëpia e Bardhë thotë se qëllimi fillestar i bisedimeve në Arabinë Saudite është sigurimi i një armëpushimi që mbulon Detin e Zi, duke lejuar lundrimin e lirë.
“Kjo ka të bëjë kryesisht me sigurinë e lundrimit,” tha zëdhënësi i Kremlinit Peskov.
Ai tha se marrëveshja e mëparshme për lundrimin në Detin e Zi, e cila kishte mbështetjen e SHBA-së, nuk arriti të plotësojë disa nga kërkesat e Moskës./vizionplus.tv
