Kremlini bëri me dije se sulmi në Ukrainë me një raketë të re balistike kishte për qëllim të paralajmëronte Perëndimin se Moska do të përgjigjet ndaj vendimeve në mbështetje të Kievit.
“Mesazhi kryesor është se Rusia do të përgjigjet ndaj vendimeve dhe veprimeve të pamatura të vendeve perëndimore që prodhojnë raketa dhe e furnizojnë Ukrainën me to dhe më pas marrin pjesë në sulme ndaj territorit rus. Pala ruse i ka dëshmuar qartë aftësitë e saj, dhe linjat e veprimeve të mëtejshme hakmarrëse, në rast se shqetësimet tona nuk merren parasysh, janë shpalosur mjaft qartë”, tha zëdhënësi i Kremlinit, Dmitry Peskov.
Peskov tha se Rusia nuk ishte e detyruar t’i paralajmëronte Shtetet e Bashkuara për këtë sulm, por i njoftoi ato gjithsesi 30 minuta para lëshimit të raketës. Ai theksoi po ashtu se Putini është i hapur për dialog.
Ndërkohë kancelari gjerman Olaf Scholz e ka quajtur sulmin e Rusisë me raketa balistike, një përshkallëzim të rrezikshem.
“Përdorimi nga Rusia i një rakete të re balistike me rreze të mesme veprimi në Ukrainë është një “përshkallëzim i rrezikshëm. Ky veprim tregon se sa e rrezikshme është kjo luftë”, tha Scholz.
Duke folur në një takim politik, kancelari nënvizoi se Gjermania është një mbështetëse e vendosur e Ukrainës, por shtoi se vendi I tij nuk do të dërgojë raketa Taurus dhe se një konfrontim midis NATO-s dhe Rusisë duhet të shmanget./vizionplus.tv
