Drejtuesi i qarkut të Korçës, Ivi Kaso ka kërkuar mirëkuptimin e qytetarëve pasi rrethrrotullimet kryesore të vendit janë bllokuar pasditen e sotme.
Opozita ka zbritur në shesh për të vijuar “mosbindjen civile”, por për herë të parë ka zgjedhur që të bllokojë disa nga rrethrrotullimet kryesore në vend.
Kaso thotë se shpreson që gjatë protestës, e cila është parashikuar të zgjasë deri në orën 20:00, të mos shënohen përplasje.
Kaso gjithashtu i ka kërkuar Policisë së Shtetit që të mos procedojë qytetarët për bllokimin e rrugës, ose të veprojë njësoj edhe kur “Kryeministri Rama bllokon rrugët për ahengje”, tha ai.
Ivi Kaso: Edhe në rrethrrotullimin e Bradasheshit, nisi etapa e mosbindjes civile që ka të bëjë me bllokimin e qarkullimit në akset kryesore rrugore. Jemi treguar të kujdesshëm që, pavarësisht kësaj mënyre jo shumë të zakontë proteste, të lajmëronim qytetarët që të merrnin masa për të qarkulluar paraprakisht.
Besoj që në një pjesë të madhe kjo është arritur. Kërkojmë mirëkuptimin e qytetarëve për të gjithë opozitarët që janë të vendosur për të përfunduar në mënyrë qytetare këtë bllokadë. Shpresoj që deri në përfundim të kësaj proteste, jo më para se ora 20:00, të mos shënohen përplasje. Deri tani konstatojmë se policia ka marrë masa për të devijuar në akse të tjera trafikun.
Policia do të procedojë penalisht organizatorë dhe qytetarë, nuk kemi dyshim. E ka bërë këtë në çdo protestë. Do të donim që Policia e Shtetit të tregonte të njëjtin zell sa herë që kryeministri për çdo aheng vendos të bllokojë qarkullimin normal./vizionplus.tv
