Igar Lednik, një anëtar i opozitës bjelloruse, ka vdekur në burgun ku po vuante dënimin për “shpifje” ndaj presidentit, Aleksandër Lukashenko. Lajmi u njoftua nga ish-partia e tij dhe organizata joqeveritare “Viasna”.
“Igar Lednik, ish-anëtar i partisë socialdemokrate bjelloruse Gramada, aktivist dhe gazetar, vdiq në burg në moshën 64-vjeçare”, njoftoi organizata politike në Telegram.
Igor Lednik u arrestua në dhjetor 2022. Ai u dënua me tre vjet burg për “shpifje” ndaj presidentit të Bjellorusisë, për shkak të artikullit të tij në gazetën e partisë socialdemokrate. Në burg, shëndeti i tij u përkeqësua rëndë.
Ai iu nënshtrua një operacioni për një problem gastrointestinal, ndërsa vuante edhe nga një problem në zemër. Organizata nuk specifikon shkakun e vdekjes apo datën e saj.
Represioni i dhunshëm dhe i përhapur shtetëror ka qenë prezent në Bjellorusi që nga zgjedhjet presidenciale të manipuluara të vitit 2020 të fituara nga Lukashenko, në pushtet që nga viti 1994. Kjo ngjarje vjen disa ditë pas vdekjes së liderit të opozitës ruse, ngjarje e cila ka ngjallur reagime e protesta në mbarë botën./vizionplus.tv/
