Donald Trump është paditur penalisht, duke shënuar rastin e parë në histori që një ish-president përballet me akuza të tilla. Votimi i një jurie të madhe në Manhatan i hapi dritën jeshile ngritjes se një padie ndaj Trump, për pagesat e bëra gjatë fushatës presidenciale të vitit 2016, për të blerë heshtjen e një aktoreje të filmave pornografikë për lidhjen jashtëmartesore.
Zyra e Prokurorit të Qarkut të Manhatanit ka hetuar ish-presidentin, për ngjarjen që lidhet me pagesën prej 130.000 dollarësh ndaj aktores. Aktakuza u konfirmua edhe nga avokati i Trump.
Përmes një deklarate në rrjetet sociale, Trump e quajti akuzën një persekutim politik dhe ndërhyrje në zgjedhje në nivelin më të lartë në histori.
“Demokratët kanë gënjyer, mashtruar dhe vjedhur në përpjekjet e tyre për të shtënë në dorë Trumpin. Por tani kanë bërë të paimagjinueshmen, duke ngritur padi ndaj një personi plotësisht të pafajshëm, në një akt flagrant të ndërhyrjes në zgjedhje.
Trump hodhi akuza edhe ndaj Prokurorit të Manhatanit, Alvin Bragg.
“Prokurori i Mahatanit Alvin Bragg, i cili u zgjodh dhe u financua nga Xhorxh Soros, është një turp. Në vend që të ndalojë valën e paprecedentë të krimit që ka pushtuar qytetin e Nju Jorkut, ai po bën punën e pistë të Joe Biden-it”.
Presidenti Biden nuk e ka komentuar aktakuzën ndaj paraardhësit të tij,por disa demokratë kanë folur hapur. Nancy Pelosi tha se “askush nuk është mbi ligjin dhe të gjithë kanë të drejtën e një gjyqi për të provuar pafajësinë”.
“Shpresojmë që ish-presidenti do të respektojë në mënyrë paqësore sistemin” – ka shkruar ajo ne Twitter.
Ngritja e akuzave ndaj 76-vjeçarit Trump, është një ngjarje e jashtëzakonshme pas vitesh hetime mbi marrëdhëniet e tij në fushën e biznesit dhe politikës. Ish-presidenti, i cili ka hedhur poshtë akuzat dhe ka sulmuar në mënyrë të përsëritur hetimin si të motivuar politikisht, pritet t’u dorëzohet autoriteteve javën e ardhshme, megjithëse detajet janë ende duke u përpunuar.
Prokurori i qarkut të Manhatanit, Alvin Bragg, po ndërmerr një hap të pazakontë. Rasti në fjalë u hetua më herët nga dy prokurorë të tjerë, të cilët refuzuan të ndërmarrin hapin me peshë të madhe politike, për të kërkuar ngritjen e padisë ndaj Trump.
