“Bashkë Fitojmë” është logoja me të cilën koalicioni i Sali Berishës me aleatët e tij do të garojnë në zgjedhjet vendore të 14 majit.
Koalicioni i bërë publik u zyrtarizua këtë të mërkurë dhe mban firmën e Sali Berishës, Ilir Metës dhe përfaqësuesve të dy partive të tjera opozitare që iu bashkuan thirrjes për bashkim, PDK dhe PBDNJ.
Ky koalicion udhëhiqet nga Partia e Lirisë, nën logon e së cilës do të prezantohen dhe kandidatët e “Foltores” të dala nga Primaret e zhvilluara nga ish-kreu i PD, Sali Berisha.
Tek partitë përbërëse të koalicionit vërehet dhe emri i Partisë Demokratike, shënuar nga Sali Berisha i cili kërkon që të përfaqësojë këtë forcë politike në zgjedhjet vendore. Aprovimi i këtij koalicioni që mban dhe emrin e PD, do të kalojë për shqyrtim në KQZ. Ky institucion ka njohur, grupimin e “Alibeajt” të përfaqësuar ligjërisht nga Indrit Sefa si zotërues të “çelësave” të selisë blu.
