Shqipëria zhvilloi seancën e fundit stërvitore përpara ndeshjes miqësore me Italinë. Në konferencën e mbajtur për shtyp, tekniku Reja theksoi se Shqipëria nuk do të heqë dorë nga skema 3-5-2 në përballjen me axurrët.
Edi Reja
Moduli është gjithmonë ky, pasi në planin afatgjatë na ka dhënë më shumë garanci. Më pas mund të ndryshojmë në ndeshje e sipër, duke parë edhe kundërshtarin, por pikërisht me këtë skemë, lojtarët ndihen më të sigurt dhe do të konfirmojmë këtë skemë. Mungojnë emra si Cikalleshi e Balaj, por edhe Gjimshiti, megjithatë ata që do të zbresin në fushë, jam i sigurt që do të japin maksimumin, ndaj unë besoj plotësisht te ata. Unë skemën 3-5-2 e kam aplikuar te Napoli dhe gjithçka ka shkuar shumë mirë. Tani edhe Conte e Mancini përdorin të njëjtën skemë, duke e cilësuar si inovatore, por dikur më kritikonin. Kam komplimentuar Mancinin për guximin për të ndryshuar dhe për të gjetur ekuilibrat e duhur.
Ndërkohë kapiteni Etrit Berisha theksoi se kuqezinjtë shpesh i ka ndëshkuar mentaliteti ballkanas, ndërsa shtoi se nga axurrët nuk i frikësohet askujt.
Etrit Berisha
Atmosfera është shumë e mirë, kam thënë gjithnjë që kemi mentalitetin ballkanik që mund të na ndëshkoj herë pas herë. Me ekipet në kategorinë tonë apo më poshtë ne lëshojmë diçka, ndërsa me ekipet më të forta nuk gabojmë në këtë drejtim. Por, mendoj se kemi mësuar nga këto gabime dhe në ndeshjet e tjera shpresojmë të ketë një qasje më të mirë sepse kur nuk je i vëmendshëm e pëson. Nesër nuk duhet të bëjmë gabime se Italia ka ekip të fortë”.
Nga kampi italian, Bonucci tha se në krahasim me vitin 2017, Shqipëria tashmë ka më shumë talente dhe eksperiencë.
LEONARDO BONUCCI
Nga ndeshjet e vitit 2017, Shqipëria është më e fortë apo më e dobët? “Skuadra shqiptare ka më shumë talent dhe eksperiencë, janë lojtarë që luajnë në Serie A apo në skuadra të tjera shumë të rëndësishme. Për ne do të jetë një ndeshje e vështirë.
Gjithashtu, Trajneri i të kaltërve Manccini nuk e fshehu zhgënjimin që Italia e tij do të luajë këtë miqësore, në vend të angazhimit në Botëror, megjithatë tha se vlerëson maksimalisht sfidën me kuqezinjtë.
ROBERTO MANCINI
Shqipëria luan në shtëpi dhe nuk është një skaudër kaq e dobët, ndaj unë shpresoj që të bëjmë një ndeshje të mirë dhe të shohim si do të shkojë.
Miqësorja e luksit do të zhvillohet sot në mbrëmje në “Air Albania” në orën 20:45.
