Shqipëria dhe Kosova tashmë kanë një tjetër pikë të përbashkët kufitare në Shishtavec-Krushevë. Në inaugurimin e saj morën pjesë ministrat e Brendshëm të të dy vendeve si dhe drejtues të policisë.
“BLEDI ÇUÇI
MINISTER I BRENDSHEM I SHQIPERISE
Duhet ta konsiderojmë një vend, jo të huaj, por një vend që përkohësisht kemi disa regjime që na e ndërlikojnë pak lëvizshmërinë, por shumë shpejt ne do t’i heqim dhe jam besimplotë se brezi jonë do ta jetojë dhe do ta shijojë këtë vizion që kemi në mendje dhe në vullnetin e dy qeverive në Shqipëri dhe Kosovë.”
Ndër të tjera Çuçi tha se pika e re kufitare do të ndikojë edhe në zhvillimin turistik të zonës. Ndërsa homologu i tij shtoi se është në vullnet të të dy qeverive për t’i lehtësuar pengesat që ndajnë dy shtetet.
“BLEDI ÇUÇI
MINISTER I BRENDSHEM I SHQIPERISE
Të dyja anët e kufirit janë zona me potenciale të jashtëzakonshme të zhvillimit të turizmit, që mund të frekuentohen nga turistë të të dy vendeve, por edhe nga turistë të huaj që nuk janë të paktë në këtë zonë.”
“XHELAL SVEÇLA
MINISTER I BRENDSHEM I KOSOVES
Deri sot kjo pikë kufitare ka qenë e kategorisë C. Nga sot kalon në kategorinë B. Kjo do të thotë se nga një punë me orar, tashmë do të kemi një pikë kufitare që do t’i shërbejë qytetarëve 24/7. Duke kaluar në kategorinë B do të kemi një pikë kufitare që do t’u shërbejë edhe shtetasve të vendeve të treta.”
Kjo pikë e re kufitare vjen pas marrëveshjes së nënshkruar mes qeverisë shqiptare dhe asaj kosovare gjatë vitit të kaluar, ndërkohë pritet të nisë zbatimi edhe të marrëveshjeve të tjera që synojnë të afrojnë më shumë dy shtetet.
