Qeveria e dalë nga zgjedhjet parlamentare të 30 gushtit të vitit 2020, në Mal të Zi duket se e ka humbur mbështetjen dhe nuk zotëron më shumicën në kuvend. Në këto kushte, analistët politikë vlerësojnë se zgjedhjet e parakohshme janë të pashmangshme.
Por zëvendës kryeministri, Dritan Abazovic njëkohësisht lider i koalicionit “E zeza në të bardhë” propozon një model të qeverisjes së pakicës.
Sipas kreut të Lëvizjes Qytetare URA, në qeverinë aktuale nuk ka vend për Frontin Demokratik, që cilësohet parti proserbe dhe proruse por as për Partinë e presidentit aktual Milo Gjukanoviq, e cila ishte më shumë se 3 dekada në pushtet.
DRITAN ABAZOVIÇ
ZV/KRYEMINISTER, MAL I ZI
“Koncepti ynë është i qartë – ne duam një qeveri të pakicës, të gjithë mund ta mbështesin atë. Tani kemi ardhur në një situatë kur duhet të zhbllokojmë rrugën evropiane të Malit të Zi dhe të krijojmë një shtet të së drejtës. Kjo qeveri nuk do të jetë kushtëzim, por një zgjidhje e mundshme, e cila do t’u ofrohet 81 deputetëve të Malit të Zi në mundësinë e mbështetjes nga më së paku 49 deputetë të parlamentit”.
Në rast se sigurohet mbështetja e shumicës në kuvend, do të iniciohet mocioni i votëbesimit ndaj qeverisë së kryeministrit, Zdravko Krivokapiq.
Subjektet politike shqiptare thonë se qeveria e pakicës është zgjidhja më e mirë pasi qeveria aktuale ka përkrahjen e vetëm dhjetë deputetëve nga 81 sa numëron parlamenti.
