Sokol Cikalleshi rigjen veten dhe golin me Akhisar. Sulmuesi shqiptar shënoi për herë të parë me skuadrën e re, në ndeshjen e vlefshme për javën e 24-t të kampionatit përballë Trabzonsporit.
Ai u rikthye si titullar, pas dëmtimit që pësoi para 2 javësh në ndeshjen e Kupës së Turqisë kundër Bashaksehir, skuadër nga ku huazua te Akhisari. Në sfidën e së hënës, ai i dha avantazhin e përkohshëm skuadrës së tij në minutën e 11’-të, pasi shfrytëzoi më së miri pasimin e Adin, duke realizuar përmes një goditje perfekte me kokë. Kështu, kavajasi u zhbllokua, pas një shterpësie prej 3 muajve, sa i takon golave në Superligën turke. Teksa gjatë festimit të këtij realizimi nuk nguroi të përqafojë mbi të gjitha trajnerin e Akhisarit, i cili ka besuar tek ai.
Me golin e Cikalleshit u mbyllën 45 minutat e pjesës së pare. Por më pas është ngjitur në katër Trabzonspori, për të shënuar 3 herë, duke i shkaktuar Akhisarit humbjen e tretë në 4 javët e fundit të kampionatit. Për momentin, skuadra e sulmuesit shqiptar mban vendin e 14-të në renditje, 7 pikë larg zonës së rënies nga kategoria.
Ndërsa goli i shënuar nga Cikalleshi është shumë i rëndësishëm mbi të gjitha në aspektin personal, meqënëse i dërgoi një mesazh De Biazit se është gati dhe në formë, para ndeshjes së shumëpritur ndaj Italisë.
