Një gjykatë në Rusi ka dënuar me 11 vjet e 1 muaj burg politikanin e opozitës Lev Shlosberg, një nga figurat e njohura të partisë liberale Yabloko, për deklaratat e tij kundër luftës në Ukrainë.
Shlosberg, 63 vjeç, u shpall fajtor për “diskreditim” të ushtrisë ruse dhe përhapje të pretenduar të “informacioneve të rreme” rreth forcave të armatosura. Akuzat lidhen me deklaratat e tij publike në favor të përfundimit të luftës, si dhe me një postim në Telegram ku kishte publikuar kopertinën e një tabloidi britanik që kritikonte presidentin Vladimir Putin.
Politikani i ka mohuar akuzat, duke i cilësuar ato si të pabaza. Ai ndodhet në paraburgim që prej dhjetorit 2025.
Partia Yabloko e ka cilësuar vendimin si një “dënim barbar”, duke argumentuar se Shlosberg po ndëshkohet për qëndrimin e tij në favor të paqes dhe armëpushimit.
Edhe Amnesty International e ka dënuar vendimin, duke e konsideruar ndjekjen penale si hakmarrje për ushtrimin e lirisë së shprehjes. Organizata ka kërkuar lirimin e menjëhershëm dhe pa kushte të Shlosbergut.
Shlosberg është shpallur më herët edhe “agjent i huaj” nga autoritetet ruse, një status që sjell kufizime dhe kontrolle të shtuara nga shteti.
Goditje edhe ndaj Yablokos
Në të njëjtën ditë, Gjykata Supreme e Rusisë la në fuqi vendimin për përjashtimin e Yablokos nga zgjedhjet parlamentare të 18-20 shtatorit.
Yabloko ishte lejuar fillimisht të merrte pjesë në zgjedhje, por vendimi u kundërshtua në gjykatë nga Partia e Mëmëdheut, e cila e akuzoi atë për shkelje të rregullave zgjedhore dhe të financimit të fushatës.
Yabloko është aktualisht e vetmja parti politike e regjistruar në Rusi që kundërshton hapur pushtimin në shkallë të plotë të Ukrainës.
Kreu i partisë, Nikolai Rybakov, tha se Yabloko do ta apelojë vendimin dhe do të vazhdojë përpjekjet për të mbrojtur qëndrimin e saj politik.
Ndërkohë, bashkëthemeluesi i partisë, Grigory Yavlinsky, e cilësoi vendimin si shenjë të një krize të thellë të sistemit politik rus.
Vendimi ndaj Shlosbergut dhe përjashtimi i Yablokos nga zgjedhjet vijnë në një kohë kur autoritetet ruse kanë shtuar presionin ndaj opozitës dhe kritikëve të luftës në Ukrainë.
