Situata e zjarrit në Krujë është normalizuar pas një nate të vështirë, gjatë së cilës flakët përfshinë disa zona dhe shkaktuan dëme në disa lagje të qytetit.
Falë ndërhyrjes nga ajri, zjarri është vënë nën kontroll dhe pjesa më e madhe e vatrave është shuar.
Megjithatë, herë pas here rishfaqen vatra të vogla zjarri, për këtë arsye situata vijon të monitorohet nga ajri.
Ndërhyrja nga toka mbetet e pamundur në disa prej zonave të prekura për shkak të terrenit të vështirë. Për këtë arsye, operacioni po vijon kryesisht përmes monitorimit ajror.
Një helikopter vijon të qëndrojë në zonën e Krujës për të mbikëqyrur situatën dhe për të ndërhyrë në rast se ndonjë vatër zjarri riaktivizohet.
Pavarësisht normalizimit të situatës, strukturat në terren vijojnë të jenë në gatishmëri, ndërsa monitorimi do të vazhdojë për të shmangur përhapjen e mundshme të flakëve.
