Një 62-vjeçar nga fshati Qilarisht i Përmetit është arrestuar pasi dyshohet se kishte përshtatur një ambient të banesës së tij si thertore të paligjshme dhe mbetjet e krijuara nga kjo veprimtari i shkarkonte në lumin Vjosë.
Operacioni u zhvillua nga shërbimet e Komisariatit të Policisë Përmet dhe Seksionit për Hetimin e Krimeve Ekonomike dhe Financiare, në bashkëpunim me AKU Gjirokastër, pas informacioneve për një aktivitet jashtë kushteve higjieno-sanitare.
Gjatë kontrollit në banesën e shtetasit A. L., autoritetet konstatuan një ambient të përshtatur si thertore për bagëti të imta, ku u gjetën dhjetëra kafshë në proces therjeje, si dhe një pjesë e tyre të therura. Gjithashtu, u gjetën edhe dhjetëra matrikuj bagëtish, të dyshuara si të falsifikuara.
Sipas policisë, në ambient ishte instaluar një tubacion përmes të cilit mbetjet e therjes shkarkoheshin në lumin Vjosë, duke shkaktuar ndotje të ujërave dhe të mjedisit.
AKU ka bllokuar menjëherë ambientin ku ushtrohej veprimtaria e paligjshme dhe ka vendosur ndaj pronarit një masë administrative prej 200 mijë lekësh të rinj.
62-vjeçari A. L., banues në Qilarisht, është arrestuar në flagrancë për veprat penale “Fshehja e të ardhurave”, “Prodhimi i kundërligjshëm i artikujve dhe mallrave industriale dhe ushqimore”, “Falsifikimi i vulave, stampave ose formularëve” dhe “Ndotja e ujërave”.
Ndërkohë, janë proceduar penalisht edhe dy veterinerë, L. D., 54 vjeç, dhe Y. H., 66 vjeç, me detyrë veterinerë në Përmet, të dyshuar për shpërdorim detyre, pasi nuk kanë kryer kontrollet dhe detyrimet ligjore ndaj aktivitetit të ushtruar nga 62-vjeçari.
Materialet procedurale i janë referuar Prokurorisë për vijimin e hetimeve.
/vizionplus.tv
