Kryeministri Edi Rama dhe ministrja e Ekonomisë Delina Ibrahimaj kanë folur për rënien e euros dhe forcimin e monedhës shqiptare gjatë takimit me përfaqësues të sipërmarrjes dhe sistemit bankar, ku u diskutua programi qeveritar “Dyfisho Sipërmarrjen Tënde”.
Rama deklaroi se zhvlerësimi i euros lidhet me forcimin e lekut, të cilin ai e konsideroi rezultat të performancës së ekonomisë shqiptare.
Ndërkohë, ministrja Ibrahimaj tha se rënia e euros është ndikuar nga disa faktorë, mes tyre hyrjet e valutës në ekonominë shqiptare nga turizmi, remitancat dhe blerjet e drejtpërdrejta nga shtetas të huaj në vend.
Sipas Ibrahimajt, pretendimet se forcimi i lekut lidhet me para të padeklaruara apo aktivitete kriminale nuk qëndrojnë, pasi raportet ndërkombëtare nuk mbështesin një konstatim të tillë.
Gjatë fjalës së tij, Rama u ndal edhe te sektori i fasonerisë, duke theksuar se modeli i bazuar te fuqia e lirë punëtore i përket së shkuarës dhe se bizneset duhet të përshtaten me një realitet të ri ekonomik.
“Koha kur kishte krah të lirë pune ka vdekur dhe sa më shumë të bashkëjetoni me iluzionin e ringjalljes së saj, aq më shumë do të mbeteni pas”, u shpreh kryeministri.
Rama komentoi gjithashtu debatet mbi forcimin e lekut, duke kundërshtuar pretendimet se ky fenomen lidhet me aktivitetet e paligjshme.
“Duke pasur në mendje edhe ekonomistët popullorë që forcimin e lekut e lidhin me narkoregjimin, një banalitet absolut. Forcimi i lekut është sukses i ekonomisë shqiptare, një nga treguesit më kokëfortë të suksesit tonë dhe nuk ka të bëjë fare me atë shpjegimin e atyre që i thonë vetes analistë e nuk dinë çfarë flasin”, deklaroi Rama.
Sipas kryeministrit, në Shqipëri hyjnë çdo vit miliarda euro nga ekonomia reale dhe pretendimet se forcimi i monedhës lidhet me aktivitet kriminal nuk kanë bazë.
“Në një vend ku miliarda e miliarda hyjnë çdo vit nga ekonomia reale, të flasësh për narkotikë e gomarllëqe të tilla nuk kanë lidhje me realitetin”, tha Rama.
/vizionplus.tv
