Gjykata e Posaçme e Apelit ka konfirmuar dënimin me 28 vite burg për Ilir Selmanin, i shpallur fajtor për përfshirjen në grupin kriminal që akuzohet për vrasjen e ish-efektivit të Policisë së Shtetit, Santiago Malko.
Vendimi u shpall të premten, në mungesë të Selmanit, i cili nuk ishte i pranishëm në seancën gjyqësore. Pas këtij vendimi, ai pritet të transferohet nga masa e arrestit në shtëpi në një burg të sigurisë së lartë, ku do të vuajë dënimin.
Ilir Selmani ishte dënuar fillimisht më 19 gusht 2020 nga Gjykata e Posaçme e Shkallës së Parë kundër Korrupsionit dhe Krimit të Organizuar. Më pas, pas një vendimi të Gjykatës së Lartë, çështja u rikthye për rigjykim, por Apeli vendosi të lërë në fuqi dënimin e dhënë në shkallën e parë.
Santiago Malko u ekzekutua me armë zjarri në Tiranë në gusht të vitit 2019. Hetimet identifikuan një grup kriminal të dyshuar si përgjegjës për organizimin dhe kryerjen e vrasjes së ish-efektivit të Policisë së Shtetit.
Njoftimi i vendimit:
Gjykata e Posaçme e Apelit për Korrupsionin dhe Krimin e Organizuar, me trup gjykues të përbërë nga gjyqtarët e caktuar nga Këshilli i Lartë Gjyqësor Dritan Hasani (kryesues), Miranda Andoni (anëtare) dhe Arbër Çela (anëtar), sot, më datë 17.07.2026, shpalli vendimin mbi çështjen penale nr. 23, akti datë 16.02.2026 regjistrimi.
Kjo çështje është regjistruar pas prishjes nga Gjykata e Lartë të vendimit nr. 48, datë 16.11.2023, të Gjykatës së Posaçme të Apelit për Korrupsionin dhe Krimin e Organizuar dhe kthimit për rishqyrtim me një tjetër trup gjykues, disponuar mbi ankimin e paraqitur nga i pandehuri/ankues I.S., ndaj vendimit nr. 28, datë 03.05.2023, të Gjykatës së Posaçme të Shkallës së Parë për Korrupsionin dhe Krimin e Organizuar.
Gjykata e Posaçme e Apelit për Korrupsionin dhe Krimin e Organizuar vendosi:
Lënien në fuqi të vendimit nr. 28, datë 03.05.2023, të Gjykatës së Posaçme të Shkallës së Parë për Korrupsionin dhe Krimin e Organizuar, për të pandehurin I.S.
Kundër këtij vendimi mund të bëhet rekurs në Gjykatën e Lartë brenda 45 ditëve, nga e nesërmja e njoftimit të vendimit.
U shpall në Tiranë, sot, më datë 17.07.2026.
/vizionplus.tv
