Kryeministri Edi Rama ishte këtë të shtunë në Jalë, në një bashkëbisedim me të rinjtë.
Në fjalën e tij, ai u ndal tek protestat për çështjen e Zvërnecit, duke deklaruar se tema fillestare e tubimeve është lënë pas, pasi sipas tij qytetarët kuptuan se realiteti ishte ndryshe nga perceptimi i krijuar.
Kryeministri hodhi sërish poshtë akuzat se qeveria ka shitur pronën publike, duke theksuar se nuk ka pasur një marrëveshje përfundimtare për këtë çështje.
Rama: Siç mund ta keni vënë re, protesta nisi me Zvërnecin dhe sot Zvërneci është harruar. Sepse, besoj unë, shumë shpejt u kuptua që realiteti i fakteve ishte i ndryshëm nga ai që njerëzit kishin perceptuar përmes kanaleve të dezinformimit.
Realiteti i fakteve nuk është që qeveria shiti atdheun, shiti Sazanin apo shiti Zvërnecin. Realiteti është krejt i kundërt. Aty ku qeveria ka përgjegjësi si përfaqësuese e interesit publik dhe administratore e pronës publike, jo vetëm që nuk ka bërë shitje, por edhe tani që flasim, për shkak se qeveria ka pasur një pozicion të qartë në negociata me palën tjetër, që Shqipëria duhet të jetë pjesë si pronare në këtë sipërmarrje, ne nuk kemi ende një marrëveshje.
/vizionplus.tv
