Princesha e Uellsit, Kate Middleton, ka ndarë një moment të ngrohtë dhe spontan gjatë vizitës së saj në spitalin pediatrik Evelina London, ku ishte e pranishme më 6 korrik në rolin e mbrojtëses së institucionit.
Gjatë takimit me pacientët, një djalë 10-vjeçar me emrin Ejran e pyeti Kate Middleton nëse ajo ishte mbretëresha. Me buzëqeshje, princesha iu përgjigj: “Jo, jam Princesha e Uellsit”, duke shkaktuar një moment të këndshëm gjatë bisedës së tyre.
Më pas, Kate i tha vogëlushit se ishte e lumtur që e takonte dhe se kishte ardhur për të parë punën e rëndësishme që bëhet në spital, si dhe për të njohur fëmijë të guximshëm si ai. Ajo e pyeti për kohën që kishte kaluar në spital, miqtë që kishte krijuar dhe interesat e tij.
View this post on Instagram
Gjatë bisedës, të dy zbuluan se kishin një pasion të përbashkët për filmat “Shrek”. Kate Middleton tregoi se edhe tre fëmijët e saj, Princi George, Princesha Charlotte dhe Princi Louis, e pëlqejnë shumë këtë film. Ajo madje kërkoi të lexonte edhe një poezi të shkruar nga pacienti i vogël.
Kate Middleton mbështet spitalin Evelina London prej vitesh dhe që nga viti 2018 mban rolin e mbrojtëses zyrtare të tij. Vizita e saj këtë herë mori një rëndësi të veçantë, pasi institucioni po bashkëpunon për krijimin e një qendre të re për trajtimin e kancerit te fëmijët, ndërsa vetë princesha ka kaluar një periudhë trajtimi pas diagnostikimit me kancer në vitin 2024.
Për këtë vizitë, Kate zgjodhi një fustan të bardhë elegant të tipit “shirt-dress”, të cilin e kishte veshur edhe më parë në vitin 2019 gjatë turneut të Wimbledon. Ajo e kombinoi me këpucë të zeza dhe një rrip të hollë në bel, duke ruajtur stilin e saj klasik dhe elegant.
