Dy ish-fermerët, Iliri dhe Ervini u përballën me njëri-tjetrin në Post Ferma VIP pas debateve dhe hatërmbetjeve.
Ervini u shpreh se ishte ndjerë i zhgënjyer nga nominimi i bërë prej Ilirit, të cilin e konsideronte mik.
Nga ana tjetër, Iliri mohoi kategorikisht që mes tyre të kishte ekzistuar një miqësi e tillë.
Iliri gjithashtu akuzoi Ervinin se kishte tentuar të përfitonte nga raporti me të dhe nga afërsia me fituesen e Ferma VIP, Moza Ahmeti.
Ndërkohë sipas opinionistes Einxhel Shkirës, ai ka qenë një nominim i organizuar nga disa fermerë me qëllim dobësimin e pozicionit të Mozës në lojë.
Pjesë nga biseda:
Floriani: Ju keni pasur edhe një miqësi jashtë.
Iliri: Miqësia është shumë fjalë e madhe, nuk krijohet me pesë takime.
Ervini: Ka disa vlera që ne i pasqyrojmë jashtë, ka njerëz që shohin, fëmijë. Nuk më vjen keq që dola, por në atë lloj mënyre dhe nga një njeri që e konsideron mik, që të thotë “të kam zemër”.
Iliri: Unë s’i kam thënë asnjëherë këto fjalë. Këto i ke ëndërruar ti që t’i thoja. Unë s’e quaj mik një person që e kam takuar pesë herë.
Ervini: Njeriu ka karakter, dinjitet, vlera.
Iliri: Ti s’ke pasur karakter se si hyje nga dega në degë. E tregove veten tënde. Kishe frikë nga televotimi.
Ervini: Ne kur ishim bashkë, se s’ia di as emrin tani, përshëndesnim gjithmonë fëmijët.
Iliri: Ke pasur posterin në dhomë.
Ervini: Dhe kur vajta në shtëpi, vajza ishte shumë krenare, por i kishte bërë përshtypje dhe tha: “Pse ai shoku yt, që unë e kam takuar, të nxori në nominim?”. S’dija çfarë t’i thoja.
Iliri: Ti ke ardhur duke u lëpirë. “Më jep një dorë ndihmë”, fjalët e tua. “Më ndihmo të të ndihmoj”. Dhe unë të thoja: “Vazhdo fërko lëkurën”. Kaq ka qenë historia.
Ervini: Unë jam vetja ime, ti do e kuptosh çfarë ke bërë. Je shumë i dobët.
Iliri: Të kishe qenë vetja jote, do kishe qenë shumë herë më lart. Ti bëre atë që bëjnë shumë të tjerë, shfrytëzove Moza Ahmetin.
Einxhel Shkira: Ka qenë një nominim i orkestruar. Për hir të këtij nominimi, disa fermerë kishin rënë dakord t’i nxirrnin dy miqtë e Mozës në nominim me Mozën, që kushdo të dilte, do t’i prisnin një krah Mozës. Kjo është e vërtetuar, sepse kemi parë videot.
/vizionplus.tv
