Prona me vlerë 150 milionë euro sekuestroi prokuroria e posaçme në një tjetër operacion kundër narkotrafikut. Paratë që për origjinë kishin shitjen e kokainës janë injektuar në ekonominë shqiptare, kryesisht në kompani ndërtimi. Këto para më pas përfundonin në blerjeve të pasurive të paluajtshme, investime në ndërtim dhe hoteleri.
SPAK thotë se është kërkuar masa e arrestit në burg për 10 persona, por vetëm Florian Musai u gjet dhe përfundoui pas hekurave. Dy po kërkohen brenda vendit, ndërsa ka konfirmuar se shtatë të tjerë janë jashtë shtetit. Për të provuar akuzat për krim të organizuar në trafikun e drogës dhe për pastrimin e parave u kontrolluan 23 ambiente, shoqëri tregtare, shtëpi dhe persona.
Kanë qenë të paktën 50 ton kokainë të trafikuara në pesë episode nga 2019 në 2021 që janë dokumentuar në aktivitetin e paligjshëm. Këto ngarkesa të nisura nga Amerika Latine, konkretisht, Brazil, Kolumbi, Ekuador kishin destinacion final Holandën e Belgjikën.
Sipas SPAK, një prej tyre anëtarëve të grupit , Isa Aliu, ishte personi që kishte rol tij aktiv në krijimin e një kompanie ndërtimi që për të humbur gjurmët, fillimisht u shfaq si nënkontraktore në ndërtimin e banesave.
Gjykata e Posaçme ka vendosur në këto kushte që të bllokohen në total 491 pasuri. 266 prona të paluajtshme janë në Tiranë, Durrës, Elbasan, Shkodër, Lezhë, Kavajë e Sarandë. Po ashtu është ngrirë aktiviteti në 209 llogari bankare, automjete dhe mjete lundruese.
