Qeveria prezantoi kompaninë e re shtetërore “Albanian Digital Solution” e cila do të zhvillojë dhe mirëmbajë programet digjitale shtetërore.
I pranishëm ishte dhe kryeministri Edi Rama, i cili u shpreh se kjo kompani simotër e AKSH-it, do të heqë nevojën e bashkëpunimit të shtetit me privatin.
“ADS, që do të zhvillojë sisteme pa pasur gjithmonë nevojë që shteti t’i drejtohet privatit. Me ambicien që shteti të krijojë kompaninë më të suksesshme publike të zhvillimit të sistemeve dhe mirëmbajtjes së tyre. Një kompani që të jetë garanci për institucionet e vendit që nuk mund të mbeten peng i privatëve në mirëmbajtjen e sistemeve të tyre”, tha Rama.
Sipas kreut të qeverisë, ADS i jep hapësirë talenteve të reja në fushën e teknologjisë ndërsa theksoi se shteti do të ofrojë pagat më të larta në këtë kompani.
“Kompaninë më të suksesshme në treg, e cila të ketë kapacitetin të kthehet në një hapësirë për të gjithë talentet, që të ketë pagat më të larta në tregun e shërbimeve dixhitale. Që të ketë kapacitetin që talenteve t’u ofrojë mundësinë që të bëhen pjesë e saj, duke kombinuar qoftë punën në zyrë, qoftë në distancë në funksion të qëllimeve”, tha Rama.
Por fokusi nuk ishte vetëm tek teknologjia. Shefi i qeverisë reagoi lidhur me zërat se shteti po fal tokë në bregdetin e Zvërnecit, investitorëve të huaj.
“Zhurmën për një lajm të rremë, po flas Zvërnecin, shteti nuk po fal asgjë. Ajo është pronë private. Investitorët e përfshirë në atë proces janë tejet serioz që atë pronë e kanë marrë nga privatët. Shteti ka pasuri në anën tjetër të projektit, ku ende sot nuk ka mbaruar negociata pasi Korporata Shqiptare e Investimeve është pjesë e projektit. Dhe toka e ishullit do jetë aty e shtetit shqiptar”, tha shefi i qeverisë.
Kryeministri shprehu konsideratën për Agjencinë Kombëtare të Informacionit, që sipas tij, ka ndërtuar një histori suksesi, duke kaluar nga një numër i kufizuar shërbimesh në mbi 1200 shërbime publike online dhe duke arritur më shumë se 3 milionë përdorues në “e-Albania”.
