Budapesti është përshirë tashmë i gjithi nga ethet e Uefa Champions League, finalja e madhe e së cilës do të zhvillohet në këtë vend të shtunën në orën 18:00 dhe transmetohet në Vizion Plus.
Të gjitha përgatitjet kanë nisur me hapjen e Fun Zone që është traditë tashmë nga UEFA.
Fun Zone zyrtar është pikëtakimi i mijëra e mijëra tifozëve dhe qytetarëve të cilët mund të argëtohen në 3 ditët përpara duelit të madhe, përmes aktiviteteve të ndryshme me prezencën gjithashtu edhe të yjeve të futbollit europian në të kaluarën.
Gjithashtu në Fun Zone do te ndiqet supersfida direkt me ekrane gjigandë për të gjithë ata që nuk kanë siguruar një biletë për në stadiumin “Pushkash Arena”, i cili mban 67 mijë spektakokarë.
Secila prej tifozerive ka marrë zyrtarisht 17 mijë e 200 bileta, pa llogaritur ato që shiten në treg të zi.
Çmimet si zakonisht në duele të tilla kaq të rëndësishëm kapin mijëra euro në orët e fundit.
Dueli transmetohet në mbi 200 vende të botës dhe kap rekorde shikueshmërie. Përveç atyre që kanë siguruar bileta, janë me mijëra tifozët e Arsenalit dhe Parisit që kanë mbërritur ose do të shkojnë në Budapest në çdo rast për të qenë atje për këtë duel.
Madje anglezët për shkak të pamundësisë për të gjetur vende të lira në hotelet afër stadiumit kanë gjetur një zgjidhje origjinale.
Ata kanë krijuar një ambient Fun Zone totalisht të vetin duke ngritur aty veç një ekran gjigand edhe shumë tenda që do t’i përdorin për të fjetur.
Nga ana tjetër parisienët kanë përgatitur një koreografi të veçantë të cilën madje e kanë vendosur në stadium gati për ta shpalosur të shtunën.
Skuadra e Arsenalit ishte e para që mbërriti në Budapest, ndërsa mesditën e kësaj të premteje ka mbërritur edhe Parisi.
Të dyja ekipet do t’i zhvillojnë stërvitjet e fundit sot pasdite njëra pas tjetrës në stadiumin e finales.
