Një person ka humbur jetën mbrëmjen e së mërkurës në Prishtinë si pasojë e të shtënave me armë zjarri. Viktima është identifikuar si Agron Hajdari, emër i njohur për komunitetin sportiv dhe pjesë e tifogrupit Plisat.
Sipas raportit 24-orësh të Policisë së Kosovës, i dyshuari, një mashkull kosovar, pas kryerjes së krimit është larguar në drejtim të panjohur dhe aktualisht ndodhet në arrati.
“Është raportuar për të shtëna me armë zjarri ku si pasojë viktima mashkull kosovar është qëlluar nga i dyshuari mashkull kosovar i cili është larguar në drejtim të panjohur dhe ndodhet në kërkim policor”, thuhet në raportin e policisë.
Në vendin e ngjarjes kanë dalë menjëherë njësitet policore dhe ekipi mjekësor, por viktima nuk ka mundur t’u mbijetojë plagëve të marra.
Sipas dëshmitarëve, autori i dyshuar ka qenë i maskuar dhe pas atentatit është larguar me shpejtësi. Deri tani nuk ka informacione zyrtare mbi motivet e vrasjes apo identitetin e autorit.
Agron Hajdari ishte i njohur edhe për organet e rendit, pasi në të kaluarën ishte përmendur në raste që lidhen me veprimtari kriminale dhe narkotikë.
Vrasja e tij ka shkaktuar reagime të shumta, veçanërisht nga tifogrupi Plisat, ku ai kishte qenë pjesë për më shumë se dy dekada. Në mesazhin e ngushëllimit, grupi shprehu dhimbjen për humbjen e tij, duke theksuar kontributin për tribunën, klubin dhe Kombëtaren ndër vite.
“Kujtimi për të do të mbetet gjithmonë i gjallë. Pusho i qetë Goni! Ultrasit nuk vdesin kurrë”, thuhet në reagimin e tyre.
/vizionplus.tv
