Që prej fundjavës, Europa është mbërthyer nga një valë e pazakontë e të nxehtit, që ka sjellë temperatura rekord për muajin maj.
Për pasojë të paktën 11 viktima janë shënuar në Francë dhe Britaninë e Madhe.
Kontinenti po përjeton temperatura tipike të mesit të verës, ndërsa meteorologët paralajmërojnë se fenomeni lidhet drejtpërdrejt me ngrohjen globale.
Në Britaninë e Madhe, termometri arriti deri në 35.1 gradë Celsius, niveli më i lartë i regjistruar ndonjëherë për muajin maj.
Autoritetet britanike e cilësuan situatën si të paprecedentë, ndërsa katër persona humbën jetën pasi hynë në ujë për t’u freskuar.
Situatë e rëndë paraqitet edhe në Francë, ku shtatë persona kanë humbur jetën në incidente të lidhura me vapën ekstreme.
Temperatura shumë të larta janë regjistruar edhe në Spanjë. Në Sevilje termometri shënoi 37 gradë, ndërsa meteorologët paralajmërojnë se në ditët në vijim temperaturat mund të arrijnë deri në 40 gradë në jugperëndim të vendit.
Në Madrid dhe qytete të tjera, rrugët janë boshatisur për shkak të temperaturave të larta.
Edhe Italia ndodhet në alarm. Në disa qytete temperaturat janë deri në 5 gradë mbi normalen sezonale. Autoritetet kanë shpallur masa të posaçme për mbrojtjen e të moshuarve dhe personave me probleme shëndetësore.
Sipas ekspertëve, vala e të nxehtit po shkaktohet nga një masë ajri shumë e nxehtë që vjen nga Afrika e Veriut dhe po përhapet në të gjithë Europën Perëndimore.
Meteorologët paralajmërojnë se episode të tilla do të bëhen gjithnjë e më të shpeshta për shkak të ndryshimeve klimatike.
Ndërkohë, një studim i publikuar nga Barcelona Institute for Global Health në revistën “Nature Health” tregon se vetëm gjatë viteve 2022 deri në 2024, rreth 180 mijë persona në Europë kanë humbur jetën si pasojë e vapës ekstreme.
