Një ditë pasi konferencës së tetë ndërqeveritare me Bashkimin Europian, kryeministri Edi Rama ndau disa nga momentet e përgatitjes së delegacionit shqiptar për takimin e nivelit të lartë në Bruksel.
Rama e quan krenari për Shqipërinë faktin që çdo hap po bëhet edhe më shumë Europiane, duke e quajtur anëtarësimin si një martesë me Unionin.
“Yes I do. Të lidhur me njëri-tjetrin përgjithmonë”, tha Rama.
Mbrëmjen e së martës u konfirmua plotësimi i piketave të Ndermjetme në Grupkapitullin “Themeloret” për Shqipërinë, teksa Komisionerja për Zgjerimin e BE-së, Marta Kos u shpreh se Shqipëria po hyn në një proces që kërkon arritje dhe reforma të konsoliduara.
“Puna juaj e 10 viteve ka qenë e suksesshme. Janë hedhur hapa në mbrojtjen e të drejtave të njeriut. Ngritja e institucioneve të reja të drejtësisë, ka frenuar ndërhyrjen e politikës në sistemin gjyqësor. SPAK ka vërtetuar se mund të japë rezultate dhe të bëhet institucioni më i besuar në Shqipëri. Kremtoni arritjen dhe le t’i kthehemi menjëherë punës. Prej jush sa më shumë kapituj të mbyllen në rrugëtimin e anëtarësimit të Shqipërisë, aq më i suksesshëm do të jetë edhe bashkëpunimi me BE-në”, tha Kos.
Synimi i vendit tonë për mbylljen e negociatave brenda vitit 2027 për Marta Kos mbetet i arritshëm madje bëri dhe një premtin.
“Kur flasim për datën ju thashë që mbështesim vizionin e Shqipërisë për mbylljen e negociatave deri në vitin 2027 dhe pastaj do i ngjitem Korabit bashkë me kryeministrin. Kjo është e vetmja piketë mbyllëse që kam pasur sot. Por mund t’i ngjitemi edhe kullës Eifel”, tha Kos.
Gjatë konferencës së tetë ndërqeveritare, Kryeministri Edi Rama u tregua optimist dhe sipas tij ky është vetëm fillimi i një procesi që shqiptarët e kanë kërkuar prej kohësh.
“Kemi thyer një tjetër rekord, ne i çelëm të gjithë kapitujt brenda 11 muajve dhe ishte shumë shpejt. Ne kaluam nga kjo te faza e nisjes së mbylljes së kapitujve me këtë konferencë të sotme e cila bëhet sërish brenda një afati shumë të shkurtër. Ndihemi krenar por kemi dhe shumë përgjegjësi sepse nuk është fundi por është fillimi i fundit”, tha shefi i qeverisë shqiptare.
Tashmë Shqipëria duhet të punojë për mbylljen e grupkapitujve që sipas zyrtarëve të lartë të unionit, do të jetë edhe testi me i madh për vendin tone.
