Kryetari i Partisë Republikane Fatmir Mediu, gjatë vizitës në Washington zhvilloi një bisedë me Zëvendës Sekretarin Amerikan të Shtetit, Christopher Landau.
Biseda me Zëvendës Sekretarin Landau, u fokusua mbi rëndësinë e mbështetjes së vazhdueshme të Shteteve të Bashkuara për një Shqipëri demokratike, të angazhuar në luftën kundër krimit të organizuar, trafikut të drogës dhe korrupsionit.
“Ndava bindjen se Shqipëria, si vend anëtar i NATO-s, duhet të vazhdojë të forcojë institucionet demokratike, të garantojë liritë dhe të drejtat e qytetarëve dhe të sigurojë një sistem drejtësie të pavarur dhe të besueshëm,” sqaroi Mediu.
Sipas Mediut, një vëmendje e veçantë iu kushtua investimeve sipas vendimit të Samitit në mbrojtje, jo thjesht si një detyrim financiar në kuadër të NATO-s, por si një investim strategjik në forcimin e kapaciteteve operacionale, modernizimin ushtarak dhe rritjen e bashkëpunimit mes aleatëve.
