Instruktori i zhytjes, i grupit të italianëve që humbën jetën në një shpellë detare në Maldive është gjetur i vdekur në një vend tjetër nga katër viktimat e tjera, është bërë e ditur ditën e sotme.
Bëhet fjalë për 44-vjeçarin instruktor Gianluca Benedetti, trupi i të cilit u nxor i pari të premten në hyrje të shpellës Thinwana Kandu, e njohur edhe si “Shpella e Peshkaqenëve”, në një thellësi rreth 60 metrash.
Pesë persona, mes tyre një nënë e bijë, humbën jetën të enjten e kaluar teksa po përpiqeshin të eksploronin shpella në një thellësi rreth 50 metrash.
Vetëm sot, një ekip prej tre zhytësish elitarë finlandezë arriti të lokalizojë pjesën tjetër të grupit në fund të një tuneli, në dhomën e tretë të shpellës, raporton Daily Mail. Të katër trupat u gjetën “thuajse së bashku” dhe nxjerrja e tyre pritet të bëhet në ditët në vijim.
Përveç Benedettit, viktimat e tjera janë Monika Montefalcone, profesoreshë e Gjeologjisë në Xhenova, 51 vjeçe, vajza e saj Giorgia Sommacal, 22 vjeçe, biologu 31-vjeçar Federico Gualtieri dhe studiuesi Muriel Oddenino, 31 vjeç.
Ndërkohë, agjencia e udhëtimeve që organizoi zhytjen deklaroi se nuk kishte dijeni që pesë zhytësit do të zbrisnin në thellësi kaq të mëdha, shumë më poshtë se kufiri i lejuar nga autoritetet lokale (rreth 30 metra për zhytje rekreative).
Zhytësit kishin përvojë, por nuk dispononin pajisjet speciale teknike të nevojshme për zhytje në thellësi të mëdha, por vetëm pajisje rekreative. Për momentin nuk është e qartë se çfarë e shkaktoi saktësisht vdekjen e pesë zhytësve.
Fakti që asnjëri prej tyre nuk doli në sipërfaqe tregon se ata mund të jenë humbur brenda shpellës. Autoritetet nuk kanë përjashtuar ndikimin e motit të keq. Një tjetër skenar është që njëri prej tyre të ketë mbetur i bllokuar dhe të tjerët të kenë tentuar pa sukses ta shpëtojnë, duke shkaktuar panik ose mungesë oksigjeni.
Bashkëshorti i Monika Montefalcones tha se ajo mbante zakonisht një kamerë me vete, e cila, nëse gjendet, mund të hedhë dritë mbi momentet e fundit të zhytësve.
Një detaj i veçantë dhe tragjik është se Montefalcone i kishte mbijetuar cunamit të Oqeanit Indian në vitin 2004 që goditi Maldivet pas tërmetit në Indonezi.
Shpella ndahet në tre dhoma të mëdha të lidhura me kalime të ngushta, dy prej të cilave u eksploruan të premten. Kërkimi, i cili në vetvete është shumë i rrezikshëm, fillimisht ishte i kufizuar për shkak të shqetësimeve mbi oksigjenin dhe presionin.
Operacioni i parë i kërkimit për viktimat përfundoi në tragjedi të shtunën, kur zhytësi ushtarak Mohamed Mahundi u dërgua në spital dhe ndërroi jetë nga sëmundja e dekompresionit, pasi kishte ndihmuar në përpjekjet e shpëtimit. Aksidenti me zhytësit konsiderohet më i rëndi në historinë e Maldiveve, shtetit të vogël ishullor në Oqeanin Indian.
