Në krizën më të madhe që ka tregu i punës, që është mungesa e punëtorëve janë rreth 13 mijë pensionistë që zyrtarisht janë ende aktiv në tregun e punës.
Por ata vijojnë të tatohen njësoj si çdo punonjës tjetër. Igli Cara deputet i PD-së si dhe Anëtar i Komisionit të Ekonomisë ka depozituar në Kuvend një nisëm që kërkon përjashtimin nga pagesa e sigurimeve shoqërore të pensionistëve ende aktiv në punë.
“Shifrat zyrtare tregojnë se janë 13 mijë pensionistë që punojnë. Por unë ju siguroj, që shifra mund të jetë edhe tre herë më e lartë, pasi shumë prej tyre punojnë në informalitet. Për të formatizuar këtë kontingjent të tregut përjashtimi nga pagesa e sigurimeve do të ishte një hap në drejtimin e duhur. Logjika e pagesës së sigurimeve është që këto para ti kthehen individit në të ardhmen, por pensionistët nuk përfitojnë nga këto para që paguajnë sot”, sqaroi Cara në studion e emisionit e-ZONE.
Z.Cara apelon që edhe mazhoranca të ofrojë konsensus për miratimin, pasi nisma i vlen formalizmit të tregut.
“Sipas përllogaritjeve kostoja totale e kësaj nisme arrin në 18 mln euro në vit. Shifra nuk është e lartë, por në çdo rast është domethënëse për skemën e pensioneve e cila mbetet ende deficitare. Por analizat e tregut thonë se sa më të lehta të jenë politikat fiskale aq më shumë nxisin formalizmin. Ndaj dhe kjo kosto do të kompensohet me zyrtarizimin e shumë pensionistëve të tjerë që punojnë në të zezë dhe që do ti nënshtrohet tatimit mbi të ardhurat personale”, tha Cara.
Në Shqipëri përveç pensioneve shumë të ultë që nuk përballojnë jetesën, shumë pensionistë punojnë në bizneset e familjes, kryesisht të fëmijëve, të cilët konsiderohen të vetëpunësuar.
/vizionplus.tv
